Ry Fiangonana malala !
Tsy hay ny tsy hisaotra an’Andriamanitra, satria nahatratra izao faran’ny taona 2024 izao isika.
Be ny zavatra nifamahofaho nolalovantsika. Teo hatrany ny Tompo fa tsy nandao antsika ary mbola manome ho avy mamirapiratra ho an’ izay mametraka ny toky Aminy.
Amin’ izao taon-jato faha-21 diavintsika izao, tsy azo hodian-tsi-hita ny herisetra isankarazany. Mihorohoro ny tany manoloana ny fihorakorahan’ ny ady etsy sy eroa. Ketraka ny fon’ ny olona !
Hoy ny mpaminany Isaia :
Ny vahoaka mandeha ao anatin’ ny haizina dia hahita hazavana lehibe ; ary ny olona mipetraka ao amin’ ny tany izay tandindomin’ ny fahafatesana dia hiposahan’ ny hazavana. Fa ny kiraro rehetra entim-pahavalo ka mikatrokatroka mampihozongozon-tany ary ny fitafiana rehetra voahorona mihosin-dra dia samy hodorana avokoa ho levon’ ny afo. Satria misy zaza teraka ho antsika ; zazalahy no omena antsika ; eny an-tsorony ny mari-piandrianany, ary ny anaram-boninanihy dia hatao hoe : mpitondra mahay, Andriamanitra mahery, Ray mandrakizay, Andriana mitondra ny Fiadanana.
Isaia 9 : 1,4-5 DIEM
Ankehitriny izao, moa tsy irina fatratra ny fahatongavan’ilay Andriana mitondra fiadanana voalazan’ i Isaia ? Eny !
Eny efa tonga Izy, ry havana. Efa nandia ny tanintsika ny faladiany.
Efa « voalefona noho ny helotsika Izy sady notorotoroina noho ny fahadisoantsika ; ny famaizana antoky ny fiadanantsika no nihatra taminy, ary ny ratra nahazo Azy no nahasitrana antsika » (Isaia 53.5 DIEM)
Raha tamin’ ny alalan’ ny mpaminany no nitenenan’ Andriamanitra fahiny, « amin’ izao andro farany izao kosa dia tamin’ ny alalan’ ny Zanany no nitenenany tamintsika »(Heb 1.2 DIEM).
Mbola miteny amintsika Andriamanitra amin’ izao andro Krismasy izao, ry havana, araka ireo Teny notanisaina eo ambony ireo.
Moa ary, mbola ho ketraka ihany va ny fontsika manoloana ny zava-misy mihatra amintsika ankehitriny ? Tsia !
Samia ary mandray izany teny soa mahafaly izany amin’ ny finoana marina, ho anao sy ny ankohonanao manao Krismasy 2024.
Dia mirary taom-baovao 2025 ho anareo rehetra eo ambany fiarovan’ ny Tompo Andriamanitra !
