PASKA 2021

« PASKA FANASITRANANA SY FANAFAHANA »

« Aza talanjona ; mitady an’i Jesosy  avy any Nazareta, Izay nohomboana tamin’ny hazo fijaliana,  hianareo ; EFA NITSANGANA IZY ; tsy ato Izy. Fa mandehana, lazao amin’ny mpianatra sy Petera fa mialoha anareo ho any Galilia Izy ».(Marka 16.6-7)

Izany tenin’ny anjely, tamin’ireto vehivavy tonga teny amin’ny fasana vao maraina ireto, no hiarahabana antsika mpianakavin’ny finoana eto amin’ny Tafo FPMA Poitiers nahatratra izao PASKA 2021 izao.

VELONA NY TOMPO, ry havana.

FANASITRANANA amin’ny aretina rehetra tokoa, indrindra fa amin’izao covid-19 izao no nahafatesan’ny Tompontsika teo amin’ny hazo fijaliana.

FANAFAHANA antsika amin’ny gejan’ny heloka amam-pahotana koa no nandresen’i Kristy ny fahafatesana.

Endriky ny fitiavany ahy sy ianao izany, ry havana malala.

Toa ireto vehivavy misionera voalohany ireto izay nahazo hafatra ho an’ireo mbola tsy mahalala, isika Fiangonana koa dia manana adidy hampiely izany « Vaovao Mahafaly » izany.

Efa tonga ny taom-pamonjena ho anao izay mandray ny FANASITRANANA sy ny FANAFAHANA amin’ny finoana an’i Jesosy Kristy.

Izao no voasoratra :

« Miderà ny TOMPO ianareo fa tsara Izy : – eny, maharitra mandrakizay ny fitiavany !

Ity no andro nataon’ny TOMPO mba hifaliantsika sy hiravoravoantsika »

(Salamo faha-118.1,24) 

Ho Azy irery ihany ny voninahitra. Ho antsika rehetra kosa ny fiadanana!

Amen.

 

Ny Mpitandrina Mpandrindra

Emilienne RASEHENOARIMANANA

MISOKATRA ISAKY NY ALAHADY NY FIANGONANA :

1/ Fotoam-pivavahana manomboka amin’ny 4 ora tolak’andro

2/ Fandraisana ny Fanasan’Ny Tompo : isaky ny Alahady voalohany sy faha-3-n’ny volana

3/ Alahady karakarain’ny Sampana Fifohazana ny Alahady faha-4

4/ Raha misy ny Alahady faha-5 , dia natokana ho an’ny Sampana Sekoly Alahady izany